尋晚瞓唔著手痕將呢個page由頭碌咗一次，覺得自己好似走咗一段奇秒途程咁。

嗰...

尋晚瞓唔著手痕將呢個page由頭碌咗一次，覺得自己好似走咗一段奇秒途程咁。

嗰陣係2015年7月，我啱啱出來飛，未做過服務行業嘅我，真係日日返工都覺得發現新大陸咁，我仲記得我第一次去曼谷layover，第一次踏入個機場，好似大鄉里出城咁，見到啲建築物、雕塑、擺設都「嘩嘩嘩……」睇返一開始畫嗰啲post，內容中流露住青澀，見到一個初出茅廬小伙子嘅懵懂，又有邊個會諗到而家會變成一個老奸巨猾。

一開始啲post冇乜人留意，到後來好快就有Yahoo!、茄子航空同埋出版社等等賞識，個page一下子由幾千followers爆到上一萬。嗰陣嘅我仲係一個怕醜小伙子，第一次去書展幾乎要好似穆斯林女人咁包晒全身，對住啲所謂支持我嘅人真係好驚，好唔明點解呢個世界會有人專登嚟搵我，憑什麼。

叫做開咗個好靚嘅頭，我就順理成章咁繼續去創作航空故事。而家諗返，航空公司好似間接幫我個卡通人物出咗道咁。但講真，其實我並冇學過畫畫，我大學係讀好commercial嘅廣告設計，係教你點諗橋為主，所以我一直自問自己並唔係以畫功取勝，都好多謝啲fans一直默默忍受我拙劣嘅畫功，令我呢五年來可以不斷進步，到而家都叫做出到啲自己滿意嘅作品同產品。

喺第一間航空公司做嗰陣，嗰陣心入面埋咗個小小嘅種子，就係可以一路飛、一路畫畫。一邊廂可以繼續做空少，然後慢慢升職升到乘務長、高級乘務長；另一邊廂就係可以一年出一本書，用繪本記錄我個飛行生涯。

但到咗飛咗兩年幾之後，就發覺已經飛到有啲冇乜新鮮感，記得嗰陣公司啱啱開日本，我一個月飛四次……到後來，我係去到淨係匿喺酒店唔出街……加上自從出書之後，個身份越嚟越高調，返工成日都好大壓力，好多人談論，返工都唔係特別開心，於是我就第一次去遞信辭職。

辭職時manager叫我繼續堅持下可能有得升職，於是我又留低咗。過咗一個幾月，無那那有個維記澳洲膠流計劃，我諗都冇諗就apply咗，因為嗰陣覺得喺茄子航空要體驗嘅嘢已經夠咗，覺得返工好冇動力，好需要轉換一個新環境、有啲新衝突，加上以前大學去過exchange一直好鍾意外國文化。

於是，呢個page又注入咗一股新能量，就係我去到澳洲公司嘅所見所聞。而家諗返，維珍呢三年應該係我職業生涯入面最開心、最難忘嘅日子。曾經，我因為畫呢個page太高調而收獲咗一啲haters，甚至遭受過一啲陷害，令我對身邊嘅人失去晒信心，覺得呢個世界好黑暗，亦好大原因係當時我仲未夠成熟去面對。到咗維珍之後，每班機、啲澳洲同事嗰種熱情、友善、單純、直接，係直接融化咗我。嗰陣好多fans都會留言話，你開心咗好多。記得嗰陣真係唔會覺得返工係一種壓力，每班機都好期待會見到邊個同事，作為飛機上面唯一一個香港人空服員，係好proud同埋好樂意去幫助每一個有需要嘅乘客。

到後來出咗三本繪本《維記膠流日記》有買嘅應該都知。最美好嘅日子總唔能夠維持到永遠，由上年社會運動開始，航班載客量明顯減小，到之後武X肺炎，真係可以一班機9個鐘得10幾20個客，有8個鐘都係坐喺度。冇幾耐，維記就宣佈做唔住條香港線……

然後就到我喺個page宣佈我會辭職，而家睇返臨辭職啲posts，個個post都有成400、600、上千個留言，估唔到畫咗五年，大家會咁關心我嘅發展……始終呢個係因為我入咗航空業而開嘅page，離開咗航空業之後，究竟點算好呢……？然後，我搞咗次《空中飛傭告別年宵》，好多從事航空業嘅人士專程嚟搵我，同我講byebye，叫我要加油……

Last Day咗一日之後就有間北歐航空請咗我，點知去到歐洲先爆武X肺炎，training第二日就會人send返返香港，正式變成失業人士……

然後，我將個page改咗名，全職創作咗大半年，就係你而家見到嘅我。

有邊個會諗到，2015年7月6日畫嘅第一個post，會引領到我今日？當中好似過山車咁，經歷咗咁多嘢。
有邊個會諗到，當初我諗住可以一路飛一路畫畫嘅小小夢想，會變咗而家全職創作？只能夠講，計劃從來都趕唔上變化。
有邊個會諗到，曾經一個含羞搭搭小伙子，而家會喺度拋頭露面、賣弄性感？

而家嘅我，唔會再好似以前咁over promoise，話自己一定會繼續畫落去，畫一生一世呢啲狗屁說話。
而家嘅我，會珍惜可以藉著創作呢樣嘢，令我唔洗餓死嘅機會，同埋感激每一個欣賞同支持我嘅人。
而家嘅我，每次想放棄嘅時候，就會諗起你哋每個無論書展、年宵、市集嚟搵我嘅面孔，而獲得動力堅持落去。

五年嚟，因為呢個page，經歷咗好多唔同嘅事，遇到唔同嘅好多人，

只好想同你哋講：
「You are my sunshine
My only sunshine
一喊　一笑　光陰似水
有日　隨年成熟了你方向未明
誰真心講個故仔你傾聽　誰跟你幸福觀天看星
明日是太平　還是革命　仍樂於新一天馳騁」
《陽光燦爛的日子─周國賢》
https://youtu.be/1XShEvLZ5Es

今年2020年，特別難捱。
但多謝你哋，
我好開心可以因為呢個page識到你哋，
係你哋
畀咗我五年嚟咁多陽光燦爛的日子。

我是傭仔，
2021請繼續多多指教。

---